Mazi Marathi Tu Marathi Poem

माझी मराठी तू

आईच्या कुशीतील पहिल्या उबे सारखी तू,
ओंजळीतल्या अक्षरांत दाटलेली माया तू,
“आई” या शब्दात उमललेलं माझे विश्व तू,
माझ्या श्वासांना अर्थ देणारी, माझी मराठी तू ।। १ ।।

सह्याद्रीच्या कड्यावरची निर्भय गर्जना तू,
महाराज्यांच्या तलवारीची जाज्वल्य ज्वाला तू,
महान संतांच्या अभंगातील कोमल करुणा तू,
हास्य,रौद्र रूप घेणारी, सौम्य गार झुळूक तू.
माझ्या श्वासांना अर्थ देणारी, माझी मराठी तू ।। २ ।।

कधी वारकरी भावनेतली नम्र पणाची प्रार्थना तू,
कधी रणांगणात ठाकलेली जिद्दीची घोषणा तू,
कधी कणखर शब्दांत लोखंडही विरघळते तू,
कधी मायेच्या स्वरांत दगडालाही पाझर फोडते तू,
माझ्या श्वासांना अर्थ देणारी, माझी मराठी तू ।। ३ ।।

आभाळाची व्याप्ती, तरी धरेच्या स्वभावाची तू,
तुझ्या लयींत दडलेला काळाचा अखंड झरा तू,
तू आहेस माझी ओळख, माझं अस्तित्व आहेस तू,
मी असेल अपूर्ण कदाचित, परी जगात परिपूर्ण तू .
माझ्या श्वासांना अर्थ देणारी, माझीच मराठी तू ।। ४ ।।

———– संतोष भरणुके